دنیا ہے ایک دشت تو گلزار آپ ہیں

دنیا ہے ایک دشت ، تو گلزار آپﷺ ہیں

ہم بے کَسوں کے مُونس و غمخوار آپﷺ ہیں

رحمت کی داستان ہیں یہ پاک پنجتن

حسنؑ و حسینؑ و زہرہؑ و کرّارؑ آپﷺ ہیں

رتبہ بلند ہے سبھی پیغمبرانؑ کا

سرتاج و شاہ و احمدِ مختارﷺ آپ ہیں

اِسمِ نبی ﷺ بَلَند کِیا ذاتِ پاک نے

ذِکرِ خدا جہاں وہیں سرکار آپﷺ ہیں

بدر و احد کے معرکے ، تیغ و تبَر کی بات

 لشکر خدا کا ، قافلہ سالار آپﷺ  ہیں

نور و بشَر کی بِحث عبَث دوستو، کہ جب

تاریکیوں سے بر سرِ پیکار آپﷺ ہیں

خوددار  ، سرفراز ، شجیع اور سر بلند

سلطانِ فقر و سیّدِ احرار آپﷺ ہیں