زمانے بھر کا جو سارا دکھ ہے ہمارا دکھ ہے

زمانے بھر کا جو سارا دکھ ہے ہمارا دکھ ہے
یقیں کرو جو تمہارا دکھ ہے ہمارا دکھ ہے


یہ ساری دنیا ہمارے دکھ سے بھری پڑی ہے
یہ چاند سورج ستارہ دکھ ہے ہمارا دکھ ہے


تمہاری نسبت سے ہی جو مجھ کو ملا ہوا ہے
یہ ہجر بھی کتنا پیارا دکھ ہے ہمارا دکھ ہے


یہ دنیا گویا ہے ایک بلڈنگ پہ کام جاری
ہے اس میں شامل جو گارا دکھ ہے ہمارا دکھ ہے


دکھوں کا کوئی بھی استعارہ نہیں ہے ممکن
دکھوں کا ہر استعارہ دکھ ہے ہمارا دکھ ہے


ہماری دنیا ہے ایک دریا کے جیسی عاجزؔ
وہ جس کا ہر اک کنارا دکھ ہے ہمارا دکھ ہے