یہ زیست رنج میں گزرے کہ شادماں گزرے

یہ زیست رنج میں گزرے کہ شادماں گزرے
ترے بغیر جو گزرے تو رائیگاں گزرے


بہ قید ہوش جو گزرے بقید جاں گزرے
وہ کیا مقام محبت سے کامراں گزرے


نظر کو اپنی بصارت بھی جب گراں گزرے
خدا کرے نہ پھر آنکھوں سے وہ سماں گزرے


دیار شوق سے جب بہر امتحاں گزرے
ہم اپنی جان سے گزرے تو کامراں گزرے


قدم قدم پہ خرد سد راہ تھی لیکن
جنون شوق سلامت رواں دواں گزرے


یہ مے کدہ وہ جگہ ہے جہاں سے اے ساقی
نظر چرائے ہوئے گردش جہاں گزرے


چمن پرست ہوں مجھ کو چمن سے الفت ہے
بلا سے اس میں بہار آئے یا خزاں گزرے


ترا کرم ہے جو سایہ فگن تو کیا غم ہے
ہزار بار مرے سر سے آسماں گزرے


کسی کا فیض مبارکؔ نہیں تو پھر کیا ہے
کہ ہم جہاں سے بھی گزرے ہیں کامراں گزرے