تسکین اضطراب تمنا نہ کیجئے

تسکین اضطراب تمنا نہ کیجئے
مجھ سے جدا ابھی مری دنیا نہ کیجئے


دیوانۂ فریب تمنا نہ کیجئے
میری طرف سے مجھ کو پکارا نہ کیجئے


کچھ دور چلنے دیجئے اب خود ہی عشق کو
ہر ہر قدم پہ آپ اشارا نہ کیجئے


دل کے سوا تمام کتاب حیات میں
اک لفظ بھی نہیں جسے افسانہ کیجئے


اٹھتے ہیں جب جنوں میں گریباں کی سمت ہاتھ
کہتا ہے کوئی جیسے کہ رسوا نہ کیجئے


دل تو تڑپ اٹھے گا جو مجھ کو خبر نہ ہو
چھپ کر میرے قریب سے گزرا نہ کیجئے


شاداںؔ تھمے ہمارے تو آنسو نہ آج تک
جب سے وہ کہہ گئے ہیں کہ رویا نہ کیجئے