مجاز کی یاد میں

میری سب مجبوریاں کہتی ہیں صحراؤں میں چل
پھر انہیں تنہائیوں میں پھر سے آزاروں میں چل
یا شبستان دگر میں موت کے باغوں میں چل


اے غم دل کیا کروں اے وحشت دل کیا کروں


صبح نو کی حسرتیں سب شام ہو کے رہ گئیں
آرزوئیں خواہشیں آلام ہو کے رہ گئیں
ساری خوشیاں قیدیٔ ارقام ہو کے رہ گئیں


اے غم دل کیا کروں اے وحشت دل کیا کروں


بس مرا نالۂ غم ہے اک نشان کشتگاں
ڈھونڈھتا ہوں ماضی اپنا ڈھونڈو راہ رفتگاں
نارسا آہ الم ہے آمد و شد رائیگاں


اے غم دل کیا کروں اے وحشت دل کیا کروں


تیرگیٔ شام غم مجھ پر فدا ہے کیا کروں
دم بہ دم میرا کلیجہ نچ رہا ہے کیا کروں
یہ تو بس انجام شب کی ابتدا ہے کیا کروں


اے غم دل کیا کروں اے وحشت دل کیا کروں


نیم جاں دل پہ الم بھاری نہ ہو جائے کہیں
اس بدن سے روح بھی عاری نہ ہو جائے کہیں
مجھ پہ وحشت کا فسوں طاری نہ ہو جائے کہیں


اے غم دل کیا کروں اے وحشت دل کیا کروں