کچھ بھی تو یہاں حسب مراتب نہیں لگتا

کچھ بھی تو یہاں حسب مراتب نہیں لگتا
اور شکوۂ حالات مناسب نہیں لگتا


کیوں اس سے کہیں کچھ کہ جو سن کے بھی رہے چپ
ایسا تو مخاطب بھی مخاطب نہیں لگتا


آتا بھی نہیں سامنے کرتا بھی نہیں بات
محبوب کہاں وہ تو مصاحب نہیں لگتا


ابلیس چرا لایا ہے کیا لوح و قلم بھی
وہ مالک تقدیر یہ کاتب نہیں لگتا


انسان سے انساں کا تعارف بھی نہیں ہے
صورت سے کوئی صادق و کاذب نہیں لگتا


شر جیت گیا ہار گیا خیر یہاں بھی
دل اب تو محبت کا بھی طالب نہیں لگتا


جس درد کی دنیا میں دوائیں نہیں ملتیں
اس درد کا اظہار مناسب نہیں لگتا