خواب غفلت سے ہم تو اب ٹوٹے

خواب غفلت سے ہم تو اب ٹوٹے
کس طرح یہ طلسم شب ٹوٹے


وہ خدا جانے مہرباں کب ہوں
سلسلہ بے رخی کا کب ٹوٹے


شکل اپنی لگے ہے بیگانی
حادثے ہم پہ کیا عجب ٹوٹے


بچھ گئی ہر طرف صف ماتم
فوج باطل پہ آپ جب ٹوٹے


جب یقیناً خطا ہے آنکھوں کی
شیشۂ دل پہ کیوں غضب ٹوٹے


معترض تم پہ تو زمانہ تھا
کس لئے ہم پہ بے سبب ٹوٹے


ہے حکومت وہاں پہ شیطاں کی
جس جگہ رشتۂ ادب ٹوٹے


جس میں سچ بولنا ہو نا ممکن
ایسی بستی پہ قہر رب ٹوٹے


تم جہاں رونق حیات بنو
زندگی کی وہاں طلب ٹوٹے


وہ خفا ہم سے کیا ہوئے مشکورؔ
جتنے ارمان دل تھے سب ٹوٹے