خوش بہت ہے کہ خوش گماں بھی تو ہے

خوش بہت ہے کہ خوش گماں بھی تو ہے
ربط دونوں کے درمیاں بھی تو ہے


سر سے پا تک وہ آتش خاموش
دیدۂ نم دھواں دھواں بھی تو ہے


خیمہ جلنے کا راز سر بستہ
کوئی در پردہ مہرباں بھی تو ہے


شاخساروں پہ اعتماد بھی کم
چار تنکوں کا آشیاں بھی تو ہے


تیز چلنے پہ اختیار سہی
ہم سفر کوئی ناتواں بھی تو ہے


ہے قبیلے میں انتشار بہت
سرپھروں کا یہ کارواں بھی تو ہے


یاں کہ فرشی سلام ہے ممنوع
یہ فقیروں کا آستاں بھی تو ہے


کب کشش تھی بیاں میں یوں افضلؔ
یہ شب غم کی داستاں بھی تو ہے