ہر طرف تیز آندھیاں رکھنا

ہر طرف تیز آندھیاں رکھنا
بیچ میں میرا آشیاں رکھنا


دھوپ چھت پر ہوا ہو کمرے میں
لان میں شوخ تتلیاں رکھنا


چاند برسے تسلیوں کی طرح
گھر میں دو چار کھڑکیاں رکھنا


اپنی دنیا ہے دل فریب بہت
ایک دل کو کہاں کہاں رکھنا


تو رہے گا جہاں زمیں ہے تری
میں جہاں ہوں مجھے وہاں رکھنا


لفظ مل جائیں تو بیاں ہوگا
ہونٹ کانپے تو انگلیاں رکھنا


بانہہ پھیلے تو تم کو چھو آئے
فاصلہ اتنا درمیاں رکھنا


میرے لفظوں میں درد دے یا رب
میرے منہ میں مری زباں رکھنا