درد ہی درد تھی منت کش درماں تو نہ تھی

درد ہی درد تھی منت کش درماں تو نہ تھی
زندگی خواب تو تھی خواب پریشاں تو نہ تھی


جب ہوا لے کے چلی تھی ترے کوچے کی طرف
مری جانب نگراں گردش دوراں تو نہ تھی


زندگی شہر غزالاں میں بگولوں کی طرح
مجھ سے پہلے مری آواز پہ رقصاں تو نہ تھی


ہر نفس ساتھ رہی ہے مرے سائے کی طرح
آپ کی یاد مری عمر گریزاں تو نہ تھی


دل دھڑکتا ہے تو حالات بدل جاتے ہیں
رات تک کوئی کلی چاک گریباں تو نہ تھی


تو نے دزدیدہ نگاہوں سے جسے دیکھا تھا
تیری تصویر تھی تصویر گلستاں تو نہ تھی


خواب شرمندۂ تعبیر کئی تھے نشترؔ
زندگی عرصہ گہ‌ خواب غزالاں تو نہ تھی