زندگی کے افسانے
صبح کا جواں سورج
چہچہے پرندوں کے
آنکھ کھولتی کلیاں
ہنستے کھیلتے بچے
زندگی کی رونق ہیں
زندگی کے میلے میں
ہر خوشی انہیں سے ہے
ان کی مسکراہٹ سے
چاندنی بکھرتی ہے
دلہنوں سی یہ دھرتی
اور بھی نکھرتی ہے
بھر کے مانگ میں تارے
رات بھر سے آتی ہے
درد و غم کے ماروں کو
گود میں سلاتی ہے
شب کے ختم ہوتے ہی
پھر سویرا ہوتا ہے
پھر وہی حسیں منظر
دل کے داغ دھوتا ہے
صبح کا جواں سورج
چہچہے پرندوں کے
آنکھ کھولتی کلیاں
ہنستے کھیلتے بچے
پھر جواں جواں محفل
پر دلوں کے پیمانے
وقت روز لکھتا ہے
زندگی کے افسانے
