شہر کی لکھ گیا اک دھواں داستاں
شہر کی لکھ گیا اک دھواں داستاں
بام و در ہو گئے خونچکاں داستاں
سننے والوں کو ہو جب گراں داستاں
چھوڑ دو پھر وہیں ہو جہاں داستاں
ایک ہی سب کی روداد ہے شہر میں
ہر مکیں داستاں ہر مکاں داستاں
یہ تو ماضی کے اوراق بتلائیں گے
اس نے فردا کی لکھی کہاں داستاں
میرا اور اس کا ہر راز افشا ہوا
جگ میں کہتا پھرا راز داں داستاں
دشت و صحرا بھی ہمراہ چلنے لگے
جب سناتا چلا سارباں داستاں
تو وفاؔ نکتہ چینوں کی محفل میں ہے
مت سنا جائے گی رائیگاں داستاں
