قلب الم نصیب کی تشنہ لبی بجھائے جا

قلب الم نصیب کی تشنہ لبی بجھائے جا
اے میرے ساقیا مجھے شام و سحر پلائے جا


اے دل بے قرار سن رونے سے فائدہ ہے کیا
جس نے بھلا دیا تجھے تو بھی اسے بھلائے جا


برسر بام آ کے تو پردۂ رخ ہٹا ذرا
ہم بھی ہیں صاحب نظر ہم کو بھی آزمائے جا


ذوق طلوع صبح بھی دے گی یہ تیرگی تجھے
رات طویل ہے تو کیا دل کا دیا جلائے جا


جان بہار گلستاں زہرہ جمال نازنیں
نیرؔ خوش خیال کے فکر و نظر پہ چھائے جا