نکہت زلف کو ہم رشتۂ جاں کہتا ہوں

نکہت زلف کو ہم رشتۂ جاں کہتا ہوں
ہوش آتا ہے تو خواب گزراں کہتا ہوں


درد کو دولت صاحب نظراں کہتا ہوں
غم کو سرمایۂ عیسیٰ نفساں کہتا ہوں


کوئی سمجھے کہ نہ سمجھے مگر اے شمع حرم
میں تجھے شعلۂ رخسار بتاں کہتا ہوں


قطرہ دریا ہے تو کیوں شورش دریا طلبی
ہر تمنا کو محبت کا زیاں کہتا ہوں


ہے وہ آواز شکست دل گیتی جس کو
جرس قافلۂ عمر رواں کہتا ہوں


تہمت سبزۂ بیگانہ ہے سنگ بیداد
میں تو کانٹوں کو بھی پھولوں کی زباں کہتا ہوں


کون سمجھے گا مرے حسن یقیں کا عالم
عرش و طوبیٰ کو حجابات گماں کہتا ہوں


بندۂ خاک نشینان محبت ہوں روشؔ
خاک کو مسند آشفتہ سراں کہتا ہوں