کیوں بزم کی کرتا ہے تمنا دل ناداں

کیوں بزم کی کرتا ہے تمنا دل ناداں
ہو جائے گا تو اور بھی تنہا دل ناداں


ہے ہجر محبت کا تقاضہ دل ناداں
اب کر ہی لے تو پکا ارادہ دل ناداں


ہر گام پہ ہی لوگ بدلتے ہیں یہاں دل
خوش رہتا اگر تو بھی بدلتا دل ناداں


کچھ اور دھڑک اور دھڑک اور دھڑک اور
تو خود ہی سمجھ جائے گا قصہ دل ناداں


چپ چاپ ستم وقت کے میں سہ تو رہی ہوں
دیکھو نہ بنا دے یہ تماشا دل ناداں


وہ آئے تھے بیٹھے تھے کوئی بات بھی کی تھی
تو دیکھتا ہے خواب بھی کیا کیا دل ناداں


ہوگا نہ کسی سے بھی ترے غم کا مداوا
بیمار بھی تو تو ہی مسیحا دل ناداں