کھڑکی سے ذرا جھانک لے اک بار مرے یار
کھڑکی سے ذرا جھانک لے اک بار مرے یار
ہے کون ترے در پہ طلب گار مرے یار
اک گیت سر شام لتا جی کی شرن میں
اور اس پہ ترے پاؤں کی جھنکار مرے یار
ہونٹھوں سے گوارا نہیں آنکھوں سے لگا لے
ہے ذہنی کشاکش میں ترا یار مرے یار
اک شام ذرا بھر کسی درویش کی جھولی
یہ بھی ہیں تری زلف کے حق دار مرے یار
ممکن نہیں بن جاؤں کسی در کا سوالی
رہتا ہے نجف میں مرا سردار مرے یار
سب لاش مری قبر میں رکھنے پہ تلے ہیں
بس ایک صدا تھی کہ مرے یار مرے یار
ملتی نہ ہو روٹی جسے دو وقت کی ساجدؔ
وہ کیسے کرے عشق کی گفتار مرے یار
