کبھی نشاط کبھی درد بے کراں گزرے
کبھی نشاط کبھی درد بے کراں گزرے
بس ایک مجھ پہ ہی لمحات امتحاں گزرے
پہنچ سکے نہ وہاں فکر و آگہی والے
تری نگاہ کے مارے جہاں جہاں گزرے
مری وفا کا فسانہ ترے فسانے میں
عجب نہیں کہ یہی زیب داستاں گزرے
کہیں جھکی نہ جبیں تیرے سنگ در کے سوا
رہ نیاز سے کتنے ہی آستاں گزرے
جو تیری یاد کی لذت سے رہ گئے محروم
حیات کے وہی لمحات رائیگاں گزرے
کوئی تو جام بکف ہو کوئی تماشائی
نصیب پھوٹے جو ایسوں کے درمیاں گزرے
نگاہ لطف نے خود بڑھ کے مدعا پوچھا
تری گلی سے کچھ ایسے بھی بے زباں گزرے
خبر بھی ہے قمرؔ سست گام و واماندہ
سحر سے پہلے ستاروں کے کارواں گزرے
