جب جوش بہاراں تھا ان چاندنی راتوں میں

جب جوش بہاراں تھا ان چاندنی راتوں میں
ہر ذرہ گلستاں تھا ان چاندنی راتوں میں


جب اپنی اداؤں سے اک زہرہ جبیں پیکر
غارت گر ایماں تھا ان چاندنی راتوں میں


جنت تھی بہت دل کش شاداب نظاروں کی
ہر لمحہ رگ جاں تھا ان چاندنی راتوں میں


جب سرو کی صف کا وہ محراب نما سایہ
تصویر شبستاں تھا ان چاندنی راتوں میں


جب پھول سا وہ چہرہ اس جان بہاراں کا
تقدیس کا عنواں تھا ان چاندنی راتوں میں


جب وقت دمکتی سی شاخوں پہ صنوبر کی
اک دیدۂ حیراں تھا ان چاندنی راتوں میں


بھیگی ہوئی آنکھوں کا موہوم اشارا بھی
اک خلد بداماں تھا ان چاندنی راتوں میں


اعجاز محبت تھا اللہ کی رحمت تھی
قسمت پہ میں نازاں تھا ان چاندنی راتوں میں


مدت سے نہیں دیکھا اس حسن گلابی کو
شاعر کا جو مہماں تھا ان چاندنی راتوں میں