انسانیت کے نام کو رسوا نہ کیجئے

انسانیت کے نام کو رسوا نہ کیجئے
مت کیجئے برا بھی گر اچھا نہ کیجئے


یہ معجزوں کا دور نہیں ہے مرے حضور
قاتل سے زندگی کی تمنا نہ کیجئے


پردے سے خوبیوں کے دکھیں گی برائیاں
انسان کو قریب سے دیکھا نہ کیجئے


مت ڈھالیے اصولوں کو سانچے میں وقت کے
یوں مصلحت کی آنچ پہ پگھلا نہ کیجئے


خودداریوں کی موت ہے خود آدمی کی موت
دست طلب کو صورت کاسہ نہ کیجئے


دنیا نہ بھول جائے محبت کی داستاں
عارفؔ خدا کے واسطے ایسا نہ کیجئے