حسرت و یاس کا اک نقش پریشاں سمجھا
حسرت و یاس کا اک نقش پریشاں سمجھا
حال افتادہ دل شام غریباں سمجھا
قابل داد ہے اس شخص کی رنگینی فکر
دل خوں گشتہ کو جو زیست کا عنواں سمجھا
بے رخی نے تری غارت کیا معمورۂ شوق
آج دیکھا تو اسے شہر خموشاں سمجھا
یاس نے چھین لی کیا عشق کی بالغ نظری
وسعت کون و مکاں کو جو یہ زنداں سمجھا
کچھ نہ بن آیا جو سر دھن کے تو ذہن شاعر
دفتر حسن کو تصنیف بہاراں سمجھا
خوشہ چیں شوق ہے اس طبع رسا کے فن کا
جس کے افکار کو میں جنت امکاں سمجھا
تھے وہ خلوت کدۂ ناز کے پردے قاضیؔ
برگ گل جن کو مرا دیدۂ حیراں سمجھا
