فکر کو خواب خیالات کو فانی لکھنا

فکر کو خواب خیالات کو فانی لکھنا
زندگی آنکھ چرائے تو کہانی لکھنا


شاخ پہ پھول کھلے ہوں بھی تو کچھ فرق نہیں
تم بہاروں کو بھی اب دور خزانی لکھنا


یوں بھی ہو جائے گی تصنیف مکمل یارو
کچھ روایات سے کچھ اپنی زبانی لکھنا


چاند لکھنا تو نگاہوں میں ہو چہرہ اس کا
چاندنی برسے تو موجوں کی روانی لکھنا


خط بہ ہر حال رہے باعث تسکین اسدؔ
کوئی موسم ہو یہاں شام سہانی لکھنا