فکر کیجے تو زمین و آسماں کی کیجئے

فکر کیجے تو زمین و آسماں کی کیجئے
بات اپنی ہی نہیں سارے جہاں کی کیجئے


تذکرہ صحرا نشینوں کا بھی رکھیے سامنے
بات جب بھی ساکنان گلستاں کی کیجئے


زندگی کو زندگی کی شکل دینی ہو تو پھر
بات ہمدم امتحاں در امتحاں کی کیجئے


دل میں گھر کرنا ہے دنیا کے تو سب سے پیشتر
کچھ درستی اپنے اخلاق و زباں کی کیجئے


کچھ تو اس کی جانفشانی کا اسے دیجئے صلہ
یاد گاہے گاہے نظم باغباں کی کیجئے


جس زباں نے آپ کو بخشا ہے انداز کلام
پرورش اپنے لہو سے اس زباں کی کیجئے