اعتبار نگہ یار نے دم توڑ دیا

اعتبار نگہ یار نے دم توڑ دیا
آج اک ہجر کے بیمار نے دم توڑ دیا


زیست کے قافلۂ سالار نے دم توڑ دیا
راہ الفت میں دل زار نے دم توڑ دیا


ہے شفایاب مریض غم ہستی اے دوست
زندگی تھک گئی آزار نے دم توڑ دیا


کیا کیا آپ نے چہرہ سے ہٹا کر پردہ
دفعتاً حسرت دیدار نے دم توڑ دیا


کیا ترے ساغر دل کی وہ کھنک تھی ساقی
جس کی آواز پہ مے خوار نے دم توڑ دیا


منزل عظمت الفت کا پتہ پا نہ سکے
عقل کی طاقت رفتار نے دم توڑ دیا


آپ یہ آخری پیغام مسرت سن لیں
کہ حیاتؔ جگر افگار نے دم توڑ دیا