دل کو حریف گردش دوراں کئے ہوئے
دل کو حریف گردش دوراں کئے ہوئے
بیٹھا ہوا ہوں زیست کا ساماں کئے ہوئے
اب مشکلات راہ محبت کا ذکر کیا
اک عمر ہو گئی انہیں آساں کئے ہوئے
پیتا ہوں روز پیتا ہوں تلخابۂ امید
احساس لطف ساقیٔ دوراں کئے ہوئے
بہلا رہا ہوں دل کو فریب خیال سے
امید غم گساریٔ یاراں کئے ہوئے
بت خانۂ مجاز سے گزرا ہوں بارہا
خودداریٔ نگاہ نمایاں کئے ہوئے
اب جا رہا ہوں جانب مے خانۂ مغاں
صد احترام حضرت یزداں کئے ہوئے
اچھا تو آج سیر خرابات ہی سہی
لیکن خیال تلخیٔ دوراں کئے ہوئے
بیٹھے ہوئے ہیں بادہ کشان وفا خموش
احساس تلخ کامیٔ یاراں کئے ہوئے
دیکھو وہ جا رہے ہیں حریفان تیز گام
عزم طواف منزل جاناں کئے ہوئے
احباب خوش مذاق کا احسان ہے یہ رازؔ
مدت ہوئی تھی دل کو غزل خواں کئے ہوئے
