چراغ درد جلاؤ کہ روشنی کم ہے

چراغ درد جلاؤ کہ روشنی کم ہے
جنوں کی بزم سجاؤ کہ روشنی کم ہے


نہ چھیڑو ذکر تعفن بھرے زمانے کا
گلاب زخم کھلاؤ کہ روشنی کم ہے


نہ جانے چھپ گئی منزل کہاں اندھیروں میں
مرے قریب تر آؤ کہ روشنی کم ہے


تمہارے شہر کی شاید ہے صبح شب پرور
یہ کیا ہے ورنہ بتاؤ کہ روشنی کم ہے


نہ بزم فکر ہے روشن نہ جام دل لبریز
غموں کا زہر پلاؤ کہ روشنی کم ہے


صدا یہ دیتا ہے شاغلؔ رہ وفا سے کون
لہو جگر کا جلاؤ کہ روشنی کم ہے