چاند تاروں میں جی نہیں لگتا

چاند تاروں میں جی نہیں لگتا
خوش نظاروں میں جی نہیں لگتا


دل بجھا ہے کچھ اس طرح میرا
اب بہاروں میں جی نہیں لگتا


ناخدا مجھ کو ڈوب جانے دے
اب کناروں میں جی نہیں لگتا


مطربہ چھیڑ اب نہ ساز طرب
نغمہ زاروں میں جی نہیں لگتا


دل بہلتا ہے دل نگاروں میں
غم گساروں میں جی نہیں لگتا


یہ حسیں شام یہ حسین سحر
کوہساروں میں جی نہیں لگتا


کیا کروں سیر آبشار اخترؔ
آبشاروں میں جی نہیں لگتا