چاک پر کوزہ گر ہے محو سخن

چاک پر کوزہ گر ہے محو سخن
گل کھلے جا رہے ہیں دشت و دمن


ہم دریدہ بدن دریدہ بدن
اک نئے زاویے پہ نقش کہن


شعر و شاعر ہوئے ہیں شیر و شکر
کیا بہم ہو گئے زمین و زمن


ایک ہیجان نسبتوں میں کہیں
ایک ریگ رواں ہے دشت سخن


مجھ سے کیا پوچھتی ہے سیرابی
کیسے رہتے ہیں لوگ تشنہ دہن


تلخ تیزابی ترش تر لہجہ
ان کے مابین ایک شیریں دہن


ہائے دیوار گریہ ہائے ہائے
تیری پیشانی پہ ہیں کتنی شکن


کیا وہاں بھی بگولے اٹھتے ہیں
آؤ دیکھ آئیں چل کے سوئے عدن


آسماں چپ ہے اور زمیں خاموش
کچھ خبر ہے تمہیں بھی ارض وطن