اپنی اوقات زمانے کو بتاتے آئے
اپنی اوقات زمانے کو بتاتے آئے
تم جدھر آئے ادھر آگ لگاتے آئے
ہم کو محفل میں تعلق کا بھرم رکھنا تھا
دشمنوں کو بھی گلے اپنے لگاتے آئے
بس یہی ان کا کرم ہم پہ بہت بھاری ہے
جب وہ آئے تو کرم اپنا جتاتے آئے
ایک آہٹ بھی ڈرا دیتی ہے تنہائی میں
خواب جب آئے ترے مجھ کو ڈراتے آئے
خود کا گھر پھوس کا ہے یاد نہیں تھا شاید
گھر میں ہم سایوں کے وہ آگ لگاتے آئے
آئینہ قد کے برابر ہو ضروری تو نہیں
ایسی چاہت میں وہ کیوں جان کھپاتے آئے
