ذوق سجدہ ایک نقش کامراں بنتا گیا

ذوق سجدہ ایک نقش کامراں بنتا گیا
آستاں پر ان کے میرا آستاں بنتا گیا


بے نشانی کے سہارے پر نشاں بنتا گیا
ضامن منزل غبار کارواں بنتا گیا


قدرتاً بربادیوں کی داستاں بنتا گیا
خود بخود بجلی کی زد میں آشیاں بنتا گیا


کیا خطا صیاد کی اور باغباں کا کیا قصور
گلستاں میں خود تو ننگ گلستاں بنتا گیا


وائے محرومیٔ الفت ان کا غم بھی تو ندیم
بد نصیبی سے نصیب دشمناں بنتا گیا


مجھ سے کیا کہتے ہو اب دنیا جو کہتی ہے کہے
تم کرم کرتے گئے میں داستاں بنتا گیا


حامل تعمیر تھی تخریب پیہم اے شفاؔ
آشیاں مٹ مٹ کے نقش آشیاں بتا گیا