غم کی جو لذتیں ہیں انہیں جاوداں بنا

غم کی جو لذتیں ہیں انہیں جاوداں بنا
درد نہاں کو چارۂ درد نہاں بنا


امید و یاس جس میں نہ ہوں وہ جہاں بنا
یعنی نئی زمیں نیا آسماں بنا


اور آرزوئے سیر چمن کو بہار میں
اور اے اسیر کنج قفس آشیاں بنا


مشق وفا میں کیا کہوں یہ غم نصیب دل
کن مشکلوں سے خوگر ضبط فغاں بنا


وہم و خیال پر بھی تسلط ہے برق کا
وہم و خیال میں بھی نہ اب آشیاں بنا


تخریب ہی میں جلوۂ تعمیر تھا نہاں
جس شاخ پر مٹا تھا وہیں آشیاں بنا


کہہ دے زبان حال سے روداد غم شفاؔ
اپنی خموشیوں ہی کو اپنی زباں بنا