قدم قدم پہ گرے اٹھے بار بار چلے
قدم قدم پہ گرے اٹھے بار بار چلے
تمام عمر اسی طور ہم گزار چلے
زمانہ گزرا کہ دل نذر حادثات ہوا
اب ایک جاں تھی اسے زندگی پہ وار چلے
فزوں کچھ اور ہوا بندشوں سے جوش جنوں
رہا ہوئے جو قفس سے تو سوئے دار چلے
ادائے لغزش رندان بادہ مست کہاں
مچل مچل کے نسیم چمن ہزار چلے
رکوں تو گردش شام و سحر ٹھہر جائے
چلوں تو ساتھ ہر اک نقش رہ گزار چلے
جلے چراغ کھلے گل ابل پڑے نغمے
جہاں جہاں ترے دھوکے میں ہم پکار چلے
ہوا تو خون دل و جان و آرزو اطہرؔ
مذاق اہل محبت مگر سنوار چلے
