نفس نفس میں ترا احترام لے کے چلے
نفس نفس میں ترا احترام لے کے چلے
جہاں جہاں بھی چلے تیرا نام لے کے چلے
رخ صبیح پہ لہرائی ہیں سیہ زلفیں
طلوع صبح میں وہ حسن شام لے کے چلے
سمجھتا کون بہاروں کے ان اشاروں کو
وہ ایک ہم تھے جو محفل میں جام لے کے چلے
بہ نام پیر مغاں تشنہ لب رہے برسوں
اب ایک دور ہمارا بھی نام لے کے چلے
وفور شوق میں اپنا تو اب یہ عالم ہے
کہ دل میں یاد تری لب پہ نام لے کے چلے
قدم قدم پہ قمرؔ ان کی یاد آئی ہے
زہے نصیب غم نا تمام لے کے چلے
