میرے شاعر زندہ رہنا
مرا دل کچھ ڈوب رہا ہے
جب سے میں نے
نم پلکوں کی اوس میں ڈوبی
ڈوبی سی اک نظم پڑھی ہے
چپ چپ بیٹھی سوچ رہی ہوں
تم نے آخر یہ کیوں سوچا
تم تنہا ہو
میری آنکھ کا سارا افسوں
میرا کومل کومل سایہ
نرم ہوا میں شامل ہو کے
پاس تمہارے نہ آیا کیا
چپ چپ بیٹھی سوچ رہی ہوں
تم نے آخر یہ کیا لکھا
ٹوٹا پھوٹا ایک گھروندا
جانے کب کا بکھر چکا ہوں
اپنی روح کے اندھیاروں میں
اتر چکا ہوں
تم ہو صاحب
نور کا ہالہ
مانگ کی افشاں
چندن مالا
میرے شاعر
زندہ رہنا
میرے شاعر زندہ رہنا
