ماضی

زندگی کے حسن کا پیغام تھا پیغام شوق
دیدۂ حیراں میں رقصاں تھی محبت کی بہار
اس ہجوم کشمکش سے بے خبر تھی بزم ذوق
مجھ کو تھا سب نو بہ نو رنگینیوں پر اختیار


جب سحر کے پھوٹتے ہی شام کا تھا انتظار
اک ہجوم شوق سے تھا جب ہمارا دل گداز
ان دنوں کب زندگی کی تلخیاں تھیں آشکار
کیف زا تھا دو دلوں کی دھڑکنوں کا سوز و ساز


وہ بہار دل نشیں خوف خزاں سے بے نیاز
چاندنی شب صحن گل جاں خیز نغمہ زائیاں
مد بھرے خوش کن مناظر کیف پرور دل نواز
زندگی تھی ایک گاتی مسکراتی داستاں


رنج و راحت کی کشاکش پر ہے کس کو اختیار
بے نیاز این و آں ہے گرم و سرد روزگار