حرص و ہوس نے ڈھونڈے ہیں عنواں نئے نئے
حرص و ہوس نے ڈھونڈے ہیں عنواں نئے نئے
دل بستگی کے ہوتے ہیں ساماں نئے نئے
تہذیب بھی بدل گئی بدلی معاشرت
فیشن کے روز ہوتے ہیں ساماں نئے نئے
بزم سخن وراں میں بھی ہوتی ہیں جدتیں
اہل سخن نئے ہیں سخنداں نئے نئے
منزل بہت قریب ہے عمر رواں کی اب
دل پھر بھی کرتا رہتا ہے ارماں نئے نئے
ہم جیسے کم نگاہوں کو جائے پناہ نہیں
صحرا نئے نئے ہیں گلستاں نئے نئے
نجمہؔ بھلا دو گزرے زمانے کی یاد کو
لیتی ہے موڑ گردش دوراں نئے نئے
