غنچے کہیں ہیں گل ہیں کہیں باغباں کہیں
غنچے کہیں ہیں گل ہیں کہیں باغباں کہیں
ہوگا نہ ایسا اجڑا ہوا گلستاں کہیں
اللہ رے حسن دوست کی رعنائی جمال
ہو جائے محو دید نہ سارا جہاں کہیں
اپنے مریض ہجر کی کچھ لیجئے خبر
دم توڑ دے نہ آپ کا اب نیم جاں کہیں
وارفتگیٔ ذوق محبت نہ پوچھئے
سجدہ کہیں جبیں ہے کہیں آستاں کہیں
محفل میں آئے جام جو مجھ تک زہے نصیب
باقی نہ رہ گیا ہو مرا امتحاں کہیں
غیروں سے سننے والے مری داستان عشق
ہو میری داستاں نہ تری داستاں کہیں
غیروں سے ربط و ضبط ہے اسلمؔ سے بے رخی
یہ بھی وفا کے طور ہیں اے مہرباں کہیں
