چاک داماں و گریباں پہ ہنسی آتی ہے

چاک داماں و گریباں پہ ہنسی آتی ہے
کیسے انساں ہو کہ انساں پہ ہنسی آتی ہے


تم کہ ہر منزل دشوار سے ہٹ جاتے ہو
ہم کہ ہر منزل آساں پہ ہنسی آتی ہے


یہ بنائے ہوئے رنگ اور یہ تراشے ہوئے پھول
مجھ کو اس جشن بہاراں پہ ہنسی آتی ہے


رات اک زلف پریشاں کے لیے روتا ہوں
صبح ہر خواب پریشاں پہ ہنسی آتی ہے


ہم کو اک کھیل ہیں یہ طوق و سلاسل صیاد
ہم کو زنداں میں بھی زنداں پہ ہنسی آتی ہے