بیٹھے ہیں بھیگی زلف پریشاں کئے ہوئے

بیٹھے ہیں بھیگی زلف پریشاں کئے ہوئے
کافر ادائے حسن کو عریاں کئے ہوئے


دل کچھ محبتوں سے گریزاں کئے ہوئے
بیٹھا ہوں کچھ خیال پریشاں کئے ہوئے


آنکھوں میں اک لطیف سی مستی بھری ہوئی
نظروں کو ہمکنار گلستاں کئے ہوئے


آ میکدے میں بن کے بہار ہوائے صبح
چل دے ہر ایک جام کو رقصاں کئے ہوئے


موسیٰ بتا رہا ہوں یہیں جلوہ گاہ طور
نظروں کو صرف جلوۂ پنہاں کئے ہوئے


عالم دکھا رہے ہیں عجب نور و نار کا
جلووں کو حسن و عشق کے یک جاں کئے ہوئے