عدو تو چھوڑ دئے خیر خواہ مار دئے
عدو تو چھوڑ دئے خیر خواہ مار دئے
محافظوں نے کئی بے گناہ مار دئے
بہت ستائے ہوئے لشکروں کی ہیبت نے
درون قصر کئی بادشاہ مار دئے
لہو تڑپنے لگا ہے کہ سرخ نوٹوں نے
بھری کچہری میں سارے گواہ مار دئے
اندھیرا جب بھی بڑھایا گیا زمانے میں
چراغ حق نے سبھی رو سیاہ مار دئے
جب آئی بات کبھی ہمسری سے مسند پر
تو سربراہوں نے کچھ سربراہ مار دئے
نہیں ہے وقت سا عادلؔ کوئی یہاں جس نے
کلاہیں رول دیں اور کج کلاہ مار دئے
