امید ٹوٹی ہوئی خاک داں میں روشن ہے

امید ٹوٹی ہوئی خاک داں میں روشن ہے
کوئی چراغ تو دل کے مکاں میں روشن ہے


سنہری دھوپ کا پتہ خزاں میں روشن ہے
کہ آئنہ کوئی ابر رواں میں روشن ہے


جنوں ہمارا مکاں لا مکاں میں روشن ہے
ہماری گرد سفر آسماں میں روشن ہے


قدم قدم پہ ہے اب زینۂ زوال تو کیا
سر غرور ہمارا جہاں میں روشن ہے


کہاں کی وحشتیں دیوار و بام و در پر ہیں
عجیب خوف مرے صحن جاں میں روشن ہیں


منیرؔ آنکھوں میں چنگاریاں سی اڑنے لگیں
کوئی تو چشمۂ ریگ رواں میں روشن ہے