تیر ابرو جب کماں تک آ گئے

تیر ابرو جب کماں تک آ گئے
ان کی زد میں جسم و جاں تک آ گئے


داغ سیرت پر لگے تھے اور ہم
بستئ صورت گراں تک آ گئے


رفتہ رفتہ کم ہوا ضبط الم
درد جاں میری زباں تک آ گئے


ہم کو بھی اک گل بدن کی چاہ تھی
ہم بھی کوئی گلستاں تک آ گئے


منزل مقصود بھی دکھنے لگی
ہم جو میر کارواں تک آ گئے


یاد آیا جب ہمیں بچپن بہت
ہم کھلونوں کی دکاں تک آ گئے


قاتلوں کے پاس تھی دولت اپار
ان کے حق میں حکمراں تک آ گئے


موسم گل صرف یادوں میں ہے اب
عمر گزری ہم خزاں تک آ گئے