سوئے ہوئے بدن سر محشر اٹھائیے
سوئے ہوئے بدن سر محشر اٹھائیے
یہ کیا کہ بار عمر مکرر اٹھائیے
آنکھوں میں کھینچ لیجئے عکس جمال یار
اک کوزۂ عطش میں سمندر اٹھائیے
دل سنگ ہے تو سنگ کو نمناک کیجئے
اس نم سے پھر خمیر گل تر اٹھائیے
آنکھیں بچھائے رکھیے سر راہ انتظار
پلکوں پہ ناز و غمزۂ دلبر اٹھائیے
جب مصلحت ہو بیعت شب زاد پہ مصر
کوئی چراغ بر سر صرصر اٹھائیے
دنیا ہے اک عروس ہزار آشنا محبؔ
اب حجلۂ عروس سے بستر اٹھائیے
