نا یوں بھی جھانکئے سرکار اک سمندر ہے

نا یوں بھی جھانکئے سرکار اک سمندر ہے
کہ میری آنکھوں کے اس پار اک سمندر ہے


ہماری تشنہ دہانی بجھی ہے خنجر سے
وہ اور ہیں جنہیں درکار اک سمندر ہے


سفینہ ہائے محبت کو غرق کر دے گی
یہ جو ہے بیچ میں دیوار اک سمندر ہے


تم آؤ لوٹ کے تم کو گلے لگا لوں گا
کہ میرا دل بھی مرے یار اک سمندر ہے


نظام شہر بہاراں ہے کس کے ہاتھوں میں
جہاں بھی دیکھیے خوں بار اک سمندر ہے


غزل سنائی جو ثروت کو میں نے اے ہاشمؔ
وہ بولے سن کے سخن کار اک سمندر ہے