خدا کے نزدیک کوئی کمتر نہیں
بچو اک دن نبی ہمارے
مع صحابہ سفر کو نکلے
وقت پکانے کا جب آیا
سبھوں نے اپنا ہاتھ بڑھایا
ذبح کسی نے کر لی بکری
کسی نے فوراً کھال نکالی
اک اک کام کیا ہر اک نے
کام ہوئے یوں پورے سارے
مگر رہا لکڑی کا لانا
آپ نے چاہا جنگل جانا
آپ کو ہر ساتھی نے روکا
کسی کا لیکن کہا نہ مانا
اور جنگل کو آپ سدھارے
لائے اٹھا کر نبی ہمارے
دیکھ کے اخلاق ان کے پیارے
خوش ہوئے ساتھی آپ کے سارے
جوہرؔ تم بھی یاد یہ رکھو
یکساں سمجھو ہر انساں کو
