جنگل اک اسکول
جنگل اک اسکول رے بھیا
جنگل اک اسکول
پتا پتا ایک ورق ہے ٹہنی ایک کتاب
کانٹا غم کی ایک علامت پھول خوشی کا باب
مکتب کی راہوں سے بڑھ کر ہے جنگل کا طول
جنگل اک اسکول رے بھیا
جنگل اک اسکول
شام نیا سندیسہ لائے صبح نیا پیغام
مل جل کر رہنے کا سبق ملتا ہے ہر ہر گام
لال گلابی نیلے پیلے اودے اودے پھول
جنگل اک اسکول رے بھیا
جنگل اک اسکول
شیر بھی اک استاد ہمارا ہاتھی بھی استاد
بات جو سمجھے جنگل کا ہر ساتھی بھی استاد
فطرت کے رازوں کو سمجھنا ہو اپنا معمول
جنگل اک اسکول رے بھیا
جنگل اک اسکول
