جاں بہ لب حسرت و ارمان پہ رونا آیا
جاں بہ لب حسرت و ارمان پہ رونا آیا
مہرباں آپ کے احسان پہ رونا آیا
خانۂ بے سر و سامان پہ رونا آیا
گھر میں آئے ہوئے مہمان پہ رونا آیا
پھول بھی دامن فطرت میں تھے انگارے بھی
آنکھ والے تری پہچان پہ رونا آیا
گھر کے لٹنے کا مجھے غم نہیں لیکن اے دوست
کوتہ اندیش نگہبان پہ رونا آیا
بادۂ ناب کی اور اپنے خمستاں میں کمی
پیر مے خانہ کے اعلان پہ رونا آیا
کس کے گھر جائے گا سیلاب بلا میرے بعد
دور تک سوچ کے طوفان پہ رونا آیا
سست رفتاریٔ اشتر تو کوئی بات نہیں
پست آہنگ حدی خوان پہ رونا آیا
دیر سے ربط حرم سے بھی تعلق کیا خوب
اس لچکتے ہوئے ایمان پہ رونا آیا
التفات نگہ ناز مرے دوست بجا
اپنی بربادی کے امکان پہ رونا آیا
دشمن توبہ گھٹاؤں کا گلہ کیا فاروقؔ
ڈگمگاتے ہوئے ایمان پہ رونا آیا
