غیر کی بد گمانیوں پہ نہ جا

غیر کی بد گمانیوں پہ نہ جا
بے حقیقت کہانیوں پہ نہ جا


کھینچ لیتا ہے دامن احساس
پھول کی بے زبانیوں پہ نہ جا


اس کی غارت گری کو دھیان میں رکھ
عقل کی پاسبانیوں پہ نہ جا


صبر کی دوستی کو رکھ ملحوظ
جبر کی حکمرانیوں پہ نہ جا


خبث باطن کے زہر سے بھی بچ
محض شیریں بیانیوں پہ نہ جا


مستقل ظلم کا مداوا کر
عارضی مہربانیوں پہ نہ جا


روح کی بھی پکار سن اخترؔ
جسم کی کامرانیوں پہ نہ جا