دل شکستہ بھی تھا کوئی راز داں بھی نہ تھا

دل شکستہ بھی تھا کوئی راز داں بھی نہ تھا
وہ مہرباں سہی پر اتنا مہرباں بھی نہ تھا


روایتوں کے طلسمات توڑ کر یہ کھلا
غم زمانہ کوئی جور آسماں بھی نہ تھا


معاملات غم دوستی سلامت باش
وہ اعتبار کہ اندیشۂ گماں بھی نہ تھا


زمانہ ساز کبھی طبع مہ رخاں بھی نہ تھی
کہ اس مزاج کا انداز دلبراں بھی نہ تھا


محبتوں کے قرینے بدل گئے آخر
میں اس کے در پہ جو پہنچا تو پاسباں بھی نہ تھا


تمام شہر پہ طاری ہے کیسا سناٹا
سکوت صبح میں آوازۂ اذاں بھی نہ تھا