چھوڑ دے خواب میں اب خواب کی تعبیر میں آ

چھوڑ دے خواب میں اب خواب کی تعبیر میں آ
میرے محبوب سخن آ مری تحریر میں آ


آ میں سمجھاؤں تجھے قاتل و مقتول میں فرق
اے مرے دوست کبھی وادئ کشمیر میں آ


میرا دل کہتا ہے مقتل سے نکل جانے کو
اور حالات یہ کہتے ہیں زد تیر میں آ


کب تلک تنہا لٹکتا رہوں دیوار پہ میں
ساتھ دینے کو مرا تو میری تصویر میں آ


ایسے انداز اذیت تجھے ہوگا بھی نہیں
تو مرے ساتھ قفس میں مری زنجیر میں آ