بن ترے اک کمی رہی برسوں

بن ترے اک کمی رہی برسوں
دنیا ویران سی رہی برسوں


چاند بس ایک پل رکا لیکن
میرے گھر چاندنی رہی برسوں


اشک چھلکے نہیں کبھی لیکن
آنکھ میں کچھ نمی رہی برسوں


بے قراری اداس بستر پر
سلوٹیں ڈالتی رہی برسوں


مدتوں پہلے پیڑ سوکھ گیا
پھر بھی کچھ چھاؤں سی رہی برسوں


تیری خوشبو نہ لا سکے جھونکے
میری کھڑکی کھلی رہی برسوں


تیرے جانے کے بعد بھی تجھ کو
بے بسی سوچتی رہی برسوں


اپنے ٹوٹے ہوئے کناروں کو
اک ندی ڈھونڈھتی رہی برسوں